Primos cantos
(1) La musicassetta "Sos Cantos de Miali Logudoresu" può essere richiesta sul sito www.librisardi.it
(cerca: Miali Logudoresu)
Torna a Cantos
photo© anastasius-tirìas
foto in b/n
© Giulio Pala - archivio
| Primos Cantos (1) |
T’appo nadu chi gasi no andat bene
no m’abbastat su coro a l’ajulare
est propriu ca ti chelzo troppu ‘ene
si no mi che fia devidu già andare
Fiza mia cara già ses unu consolu
pius de tres meses chi ti ponzo fattu
passizende dae piatta fen’a soru
como mi sun boghende fen’a maccu.
E tumbara cadumba e tumbara lalla’
M’as rispostu chi mamma tua t’at nadu
chi a primu devo andare a ndomo tua.
Ancora devo fagher su soldadu
e a innamorare est mezus a sa cua
E tumbara cadumba...
Fiza mia cara e bogali sa fune
agabbandela cun custu faghe faghe
e si no ti nd’impoltat de niune
dami unu asu e faghimussa paghe.
S’anzoneddu pius bellu chi aia
chi fia pesende cun d’onzi atentzione
pro lu attire a fiza mia
mandigadu si l’at su matzone.
Su matzone s’at mandigadu
s’anzoneddu pius bellu chi aìa
eo nde fatto maladia
pro custu dannu chi m’at capitadu.
Ma abbaidad’ it’isfoltuna
propriu a mie deviat capitare,
coltzu eo no nd’appo ‘e foltuna
nono nono nono no.
S’anzoneddu pius bellu ‘e s’ama
chi a lu ider faghìat su disizu
moltu l’an et b’est solu sa mama
ilbelidende ca piancghet su fizu.
Custa no no la potto padire
custu dannu a traittoria
nd’app’a fagher maladia
propriu cras aia postu ‘e l’attire.
Ma abbaidad’it’isfoltuna custu raju chi m’at faladu
coltzu eo no nd’appo foltuna
nono nono nono no.
Matzonatzu fiz’e bagassa
no b’as lassadu mancu sa lana
pero t’appo a sighire sa trassa
fen’a ti tenner intro sa tana.
E ti giro comente una nassa
chena istare a su mòriga mòriga,
t’app’a fagher sa pedde a bistrassa
appiccadu a s’orija a una lòriga.
Cussu grodde brutt’ascamile
propiu a mie deviat tribulare.
Pero custa mi l’at a pagare
ca lu fatto a diriondò.
T'ana dadu unu triballiu
pulidu e bene pagadu
no ses pius un'ilballadu
...e no ses cuntentu ancora...
Como tuccas a sa sette
cun sa macchinedda noa
e arrivire a Poltu Turre
no bi pones mancu un'ora
T'ana dadu unu triballiu
ses fena motorizzadu
no ses pius un'ilballadu
e no ses cuntentu ancora...
Ma ite cheres dae sa vida!
T'asa fattu sas otto oras
e no ses mancu sueradu
unu pagu imbaddinadu
ti lamentas a su fidigu
Cheria narrer...a su figadu
pero ses bene pagadu
pro unu triballiu de otto oras
e no ses cuntentu ancora
Ma ite cheres dae sa vida....
Su fatt'est tue mi naras
chi in duas oras de triballiu
ti faghes sa zorronada
e su restu restat valliu.
Tue ses propriu curiosu
pensas chi b'appet imbrolliu
e ite cres ch'est addinosu!
chie t'at dadu su triballiu...
Ti nde ses ilmentigadu
de su ene fattu a tie:
su triballiu assicuradu
est pane siguru onzi die
Como li cheret torradu
su regalu fattu a tie:
e torradu a pagu pagu
otto oras a sa die
E ite cheres de pius, dae sa vida!
- A ninnìa
A ninnia a ninnia sa pramma dorada
drommi criadura innotzente sa notte est serena
Babbu est tendende sa roba pro l’aer a siguru
su latte ‘e manzanu, su pane ‘e onzi die.
Drommi chi babbu est vizende, no appes timoria,
drommi sa luna est bessende e dae meda at toccadu
s’avemaria.
A ninnia a ninnia sa fidza istimada
drommi criadura fadada sa notte est funguda,
babbu at seradu dae attesu su cane appeddende
sa roba est sentende arrastu de anzenu.
Drommi chi bbabu est bizende et est bene appostadu,
bae chi no l’andat in bene istanotte a su ladru
no appes timoria.
A ninnia a ninnia sa pramma dorada
drommi criadura innotzente sa notte est passende,
babbu at retzidu sa solte et a ojos a chelu
già serat benzende su frittu ‘e sa molte.
Drommi chi babbu est andende et est frittu che nie,
s’ultimu alenu pianghende l’at dadu pro a tie,
a ninnìa.
- Attitidu
Ay Antoni Maria, moltu t’an in sa roba a traittoria,
ay muzere tua, sola l’as lassada e in tribulia.
Sa campana chi ti sonat su toccu
ancu sighet s’andada ‘e chie l’at fattu.
Ay malu caminu agattet a donz’ora s’assassinu,
ay sa mala solte l’agattet in sa tana pienu ‘e solde.
A s’ora chi che ses in campusantu
ancu dien a sos fizos s’ozu santu.
E a s’ora chi t’interran in sa fossa
nde l’imbolet sa domo sa pelcossa.
- Sa domo sola
Sa campana at già sensadu ‘e toccare
ma in sa domo su pioantu no si cheret calliare
ca sa molte est restada
in sos ojos e in su coro de chie est solu.
Como sa terra at ingullidu sa cascia
e sa zente est furriende pianu pianu a conca bascia,
ma sa molte est restada
in sos ojos e in su coro de chie est solu.
Drommi Maria
già lu ides chi in sa banca
no b’at pane e nè olia
chi no b’est pius su chi l’attìat.
Pro chie est biu torrat sempre sa notte
e in su sonnu su moltu paret torradu a biu
cun sa beltula piena
de gasu de pane et de regottu.
Ma sas manos aju nd’an de chilcare,
ca sun sonnos de aera chi s’isolven in sa notte
e no passan su famine
né a mannos né a piseddina.
Chie s’ischidat intremidu
bidet s’iscuru pius nieddu
serat solu su frittu
chi faghet treulare su lettu
Ma s'isperu chi as in coro no morit
ca est sa lughe chi ispuntat a manzanu onzi die
e ti torrat s'alenu
pro sighire su caminu.
Cambiat sempre su manzanu ch'isperias
ma no cambiat su sole chi t’atzendet in su coro
cussa fiama minuda
chi dat calore a sa vida.
Canta Nineddu
pone a palte sa timoria
girat sempre sa roda
e s'abba consumit sa rocca...
- Consolu pro Giuanna
Giuanna restada ses sola
chena consolu.
Sos fizos ancora de creschere
cun pagu ajudu.
Nisciunu ti narat
comente as a fagher
su die chi resteras
chena su tantu 'e campare.
Su rettore est bennidu a domo
a t'agattare.
A narrer chi deves pregare e peldonare
a chie custu dannu t'at fattu,
ma tue Giuanna as rispostu:
"Su pregu no battit su pane
e mancu imbalzu.
E chie mi lu pienat s'istelzu
pro fizos mios.
Eo tia cherre ischire
coment'appo a faghere,
su die chi restère
chena su tantu 'e campare".
Coraggiu, Giuanna, coraggiu
chilca padronu.
e bendeli foltzas de bratzu
pro calchi soddu.
Sa vida Giuanna t'at dadu una rughe
de gigher a fundu
fena chi cambiat su mundu.
Coraggiu Giuanna coraggiu
fena pro a tie
chissà chi no benzat sa die
de su riscattu,
sa die de ti ponner su estire pius bonu
sa die de sa festa
chena bisonzu 'e padronu.
Coraggiu Giuanna coraggiu
chi sas isperas
no morin pro cantu sa vida
a boltas fèrat.
Su tempus,Giuanna, est che bentu chi olat
piure e pabiros
ch'isparini in tempus de un'ora
Coraggiu Giuanna coraggiu
chilca sa paghe
chi in coro ti cantat serena
che-i sa moddina.
Si pasas incue
ti s'indulchit sa pena
e t'as a serare
lezera e lughente che nùe....
2
[E no l'as cumpresa ancora
e intza' ti ddha cantu in casteddaju:]
Poneus is cosas in chiaru, Madale',
io sono moderno e lo sai,
quanto te.
Pero si ti pois cu' mmei, bellixè,
no es' chi ti andis cun cussu
e poi torni da me.
Naras ch'e' piu forti de tui
un turbine che ti incatena,
e intzandus turbina, porca miseria,
ma no abbarris trumentendi a mei.
Si e' propriu chi aici t'aggrada', Madale',
ognuno si fa la sua strada
credi a me.
pero mi dispraxis de aderu, bellixè,
ca in fundu a su coru ddhu scisi
ci se' tui Madale'.
Poneus is cosas in chiaru, Madale'
si es propriu de aici accabaus,
no andat be'.
Pero si ci andaus bei a fundu, credi a me,
in fundu a su coru ti giuru
ci se' tui Madale',
in fundu a su coru ti giuru,
ci se' tui Madale'.
Notte chena un isteddu est arrivida
pro custu contu nostru isfoltunadu,
pro custu amore nostru primadìu,
duradu troppu pagu.
Notte de atunzu frittu est arrivida,
pro custu amore nostru isconsoladu,
ch'est duradu su tempus de un'istìu
e poi si ch'est voladu.
Como restat sa cantone
cudda chi mi cantaìas,
fatta cun notas de oro
fin sas mezus chi aìas.
Si l'intendes istasera,
tes aer unu pagu e a mie,
ca istasera so pensende
solu a tie.
Dulches fin sos cariños de sa sera
currende fattu a s'ora chi fuìat,
nelvosu solu candu no t'idìa
a prima intrada 'e sole.
E foltes sos abrazos in s'iscuru
cuados intro a s'umbra de sa luna,
e tènnera fis cando m'istringhias
ancora calda 'e amore.
Como restat sa cantone
cudda chi mi cantaias,
no mi podet consolare
ca già l'ischis chelzo a tie.
Si l'intendes istasera
tes aer unu pagu e a mie,
ca istasera so pensende
solu a tie.
Ciao Giua’, e coment’istas
e già fimus duas dies chena nos bidere.
Conta, Giua’, comente ti la passas...
Tres annos emigradu,
in s’edilitzia e in calchi frabichedda,
tres boltas licentziadu,
bogadu chena mancu s’abba santa.
So dae unu mese in bidda ilbattuladu
comente una matracca in chida santa.
Ma comente Giua’, nachi in Germania
tottu si faghen de oro e torran riccos!
Fena Frantziscu, mih,
cuddu fidzu ‘e tia Ciana...
como nachi si c’alciat sa femina et sos fidzos.
Tue mi naras chi t’est andada male,
ma naran chi si bi istat de señores!?
Señores già bi nd’at e mannos puru,
ma no est zente ch’at devidu emigrare
et no at devidu mai istare in s’iscuru,
rispalmiende sa lughe pro chenare,
mandighende calci òu cun pan’infustu
pro poder aer a cras su tantu ‘e s’ustu.
E narabilis a cussos ch’ilbràgana
setzidos in su bar manzana e sera,
chi a s’alanzare su pane in Germania
no est a currere sa galavera.
E cant’istana incue a murrundzare,
s’est aberu no b’at che a lu proare...
A proare su frittu ‘e sas barracas
e a istare atesu dae muzere et fizos.
Istan fanfarronende che matracas
solu ca no bi deven andare issos.
Deus bi lis fettat chi a s’ateru mese
lis tocched a issos puru a alciare pes(e).
Eo naro chi b’at pagu ite cantare,
ca’ già l’appo proadu in pedde mia
e si mi nde so devidu torrare
no este chi nde fatte maladìa.
Ma no appo domo nè lettu e nè manta
(ti fia nende)
e so ispiantadu che bagassa in chida santa.
Tue Zuseppe Mureddu mancu s'alva
aias ben'ispuntada,
cando nachi t'an postu muccarolu
intro sa ula.
Asi lu ‘etten a issos su lentolu
de sa rìa,
a sos chi l'ana fattu.
Prelevadu a manzanu in su coile
t'an fattu prejoneri,
su deghe 'e maltu, fit fattende die.
Die mala t'est toccada Peppigheddu
in manos de ilbirrallia iscadenada,
sa vettura at leadu sa falada,
e fit già moltu Zuseppe Mureddu.
Ti cantamus
comente fizu 'e custa resistenscia
chi faghimus
dae sempre fen'a cando sa pascienscia
at a mancare, e at a benner s'ora
de las pagare tottu.
Bae in bonora
chi già no nd'ammentamus de a tie puru,
Peppe Mureddu, ista seguru.
Tue Zuseppe Mureddu ses eroe
de teraccos pastores.
Sa zoventude nostra proletaria
t'at a rendere onore.
Tue ses eroe de sa zente isfruttada
e in donzi leada
t'ana a fagher su dolu.
Ma odiu pro sos ch'ana moltu a tie
chi ses simbulu nostru,
su deghe 'e maltu
pro a nois est onzi die.
Odiu pro chie t'at moltu Peppigheddu
nos ad a avvelenare totta vida,
sa vida nostra chi ancora est in pigada,
ma at a cambiare, Zuseppe Mureddu.
Ti cantamus...
Vintotto zorronadas mi devet su padronu
e si no mi las dada
nde fatto dannu e dolu.
Vintotto zorronadas
fattas in sa messera,
sutta su sole 'e triulas
chi ispaccaiat sa pedra.
Pro chie no b'at foltuna
pro chie no b'at reposu
pro chie no at dinari
né trigu e né olzu,
vintotto zorronadas, creìde,
sunu meda...
Vintotto zorronadas chi a mie no m'an pagadu
su trigu est già trebbiadu e bene remonidu,
ma a mie no m'ana dadu mancu una zorronada,
su pane de onzi die, nisciunu mi lu dada...
Pro chie no b'at foltuna
ecc.
Sos tempos sunu malos, triballiu no che nd'ada,
mi toccat de ch'essire, chissà in cale leada,
aju nd'appo 'e pedire su chi m'ispettaìat,
mi toccat de ch'essire fora 'e sa idda mia.
Pro chie no nd'at foltuna
no b'at ateru remediu,
rpo chie no nd'at solte
no b'at ateru isperu,
ma solu tribulias
dae su manzanu a sera.
Naran chi sos malannos ana a benner a finire
su die chi nos pesamus a rustallios e a fusiles
a boltulare tottu in s'ora 'e sa rejone,
terrinos e cunsolzas los torramus a cumone.
Sa terra fit de tottu
e a tottu at a torrare
ma tottu at a cambiare
e at acambiare in bonu
ca no bi det aer pius(u)
né teraccu e né padronu.
( sull’aria di Solenzara, canto tradiz. corso trascritto da B.Bacara )
Cando penso a bidda mia
chi appo chelfidu lassare
ranchida sa nostalgia
de sa oghe chi mi jamad
e mi narat a torrare.
E tue andende cussa via
mi la deves saludare;
eo isto inoghe interra anzena
pro chi in coro gitte pena
chi no mi lassat mai.
Sona chiterra
boga sa nota pius pretziosa
pro custa terra
chi no appo a ilmentigare mai.
Chiterra sona
chelzo cantare a boghe piena,
ca in terra anzena
su tempus no che passat mai.
Una balca in mesu a renas
no podet pius naigare,
confidadu m'as sa pena,
cheret truncare cadena
pro torrare in altu mare.
E cando enit sa tempesta
e si pesat torra entu,
pro sa balca torrat festa
est finidu su tulmentu,
podet intrare in su mare.
Sona chiterra...
Fizas, fizigheddas mias,
no bos appo a lassare
né terra e né dinari:
fit pagu su chi aìa,
no m'at restadu nuddu.
Bois già l'ischides.
Cussu già creo chi bos l'appene nadu
ma calchi atera cosa
bos la naro eo, fizittas mia de rosa.
Fizas, fizigheddas mias,
sa vera diñidade
no l'at s'omine riccu
de inari e de manias,
eo naro chi in sa vida
e bos lu giuro,
si alet pro su coraggiu e pro sas manos
si sun bene pulidas.
Custu bos naro,
fizigheddas mias.
Cheret chi s'omine
siet in palte giusta,
pro chi peldet no est nudda
ca no li poden furare mai
né su coraggiu, né sa diñidade,
e una die
già at a binchere.
Duncas siedes a s'ala sempre
de sa rejone,
de s'omine isfruttadu e tribuladu,
de chie mezorat su mundu,
ca at coraggiu 'e gherrare
pro su chi alet.
Custu bos naro,
fizigheddas mias.
Forsi nades ch'est pagu,
no b'est mancu su tantu.
Eo no app'appidu mancu
de bos aer a dilmesu,
a nottamala...
Fizas, fizigheddas mias...
1
Ponimus sas cosas in jaru, Madale'
io sono moderno e lo sai
quanto te.
Però si ti nd'enis cun megus
bella be'
no est chi ti nd'andes cun cussu
e poi torni da me.
Mi naras ch'est pius folte e a tie,
un turbine che ti trascina,
e tando turbina, polca miseria,
e no t'istes pelcossende a mie.
Si est propriu chi gasi t'aggradat, Madale',
ognuno si fa la sua strada
credi a me.
Pero mi dispiaghet de aberu, Madale',
ca in fundu a su coro, già l'ischis,
ci sei te e solo te.
Ponimus sas cosas in jaru, Madale',
si est gasi li ogamus de cabu
e peus pro te.
Pero si b'andamus a fundu, credi a me,
in fondo a su coro ti giuro
b'appo a tie Madale'.
In fundu a su coro bi cantas
solu tue Madale'.