Modas de Santu Giolzi In Ischirìa
Modas 2
1
S’iscampagnada a Nostra Signora
2
3
4
5
Sa torrada ‘e Peppinu Buccia ‘ e Fae
6
Santa Lughia bella, sa festa ‘e cabidanni
Torna a Cantos
images Joan Mirò
Carrasegare
Eeh, tando sì chi fit carrasegare !
Sa festa ‘e santu Giolzi soberanu:
cattas e rundas e ballos a tràcchida
fena a sas duas e a sas tres de manzanu.
Sa zente tando fit pro diveltire,
ateru che chigina o malas pascas !
E balla chi ti ballo
che passaian cuddas baranta dies
chi in piatta sonaiana sas matraccas.
Sas matraccas in piatta sonaiana
e calchi foltunadu resessiat,
si nd’aiat solte,
a dare appuntamentu in calchi istalla
a sa picciocca in dominu
chi intro sa sala l’aiat fattu a padza.
In dominu pariat fena pius bella
e cuddu chilcaiat de l’infiamare
ballende e cumbidende caramellas.
Si aberu aiat foltuna poi già eniat
pro mesoretta, prima ‘e si recuire,
si fattu no gighiat babbos o frades.
Ma già capitaiat, pius de una olta,
de restare a s’asciutta,
fattende sa figura ‘e s’assu ‘e guppas.
Ca a boltas cudda, sutta a su dominu,
gihiat sos caltzones
e sutta gighiat puru sos vuttones.
E cando gasi li capitaiat
de aberu fin friguras de cozone !
Beniat sa die chi si pianghiat a Giolzi.
Tando, su maltis rassu, dae manzanu
giunghian sos boes a cudda balca a rodas,
e si che pigaiana
Duminigu Masia cun Peppe Ispanu.
Si los mentovo no lis siat a pesu
ca issos e tottu s’ainu l’an ispresu:
unu estidu 'e nieddu
cun sa este ‘e su cogiuu,
s’ateru de indianu,
cun duas pumas de colvu subra ‘e conca
e una cobelta etza ettada in coddos.
Cun tottu su chi si che tragaian
no fit tzeltu su frittu chi sentian.
Frittu a siguru issos no sentiana
ca no fit pagu su chi si sulzìana.
E giraian sa idda ettende irroccos,
oldiminzende un’ispezie ‘e filunzana
chi naraiat: "Cara zunzella,
della casa nuova
vuoi venire con me
a fare il merendino…
canta anche tu bambino ! "
ch’essian tottora…
Eo puru, chi che fia cantu una cita
lis ripetia cussa cantone istrana:
"cara zunzella della casa nuova
vieni con me a fare il merendino…"
E cuddos la sighiana:
"Tu metterai / soltanto / il tegamino,
io metto la salciccia e le due uova…"
Nendela gasi, mi’
coment’esseret istada litania.
Poi finiat:
"E insieme suoneremo lo strumento
le uova fuori e la salciccia dentro…"
Cèèè! Ite maleducadu !
Naraiat calchi femina.
E riìat.
Cando arrivian a sa piatta ‘e s’Istancu
frimmaian sa barracca,
che tragaian cosa ‘e litros de inu biancu,
rugiu o nieddu, tottu fit cheppare,
e faghian cussa dansa de sa catza.
2
E ite fit ?
Leaian a Nanni Ottu, cuddu coltzu,
e lu prendian a su palu ‘e sa balca
e cuddu mesu moltu
dae sa cottura, tott’ispettorriadu,
si lassaiat fagher unu chilciu in matta
fatt’a calvone, fumende ‘e sa calura;
Peppispanu leaiat unu bruncone
cun una boccitedda e tinta rugia
subra sa punta,
faghiat un’orazione
e mancari incheladu
bi l’iscudiat gasi, a totta foltza,
isfidiadu !
A totta foltza gasi l’iscudiat,
e cuddu, chena mancu pisulare,
si che moriat de su male cadufu,
sa tinta lu tinghiat
de sambene, pariat polcu ispeadu…
Su giru sighiat fena a notte manna,
e si faghian chi nde li essiat sa canna,
buffende inu a trainos,
biancu, rugiu, nieddu, ite si siat.
Cando sa balca si lis arenaiat
isfascendesi in calchi cantonada,
tando a sa fine si nde falaian
o a narrer medzus nde los falaiana,
e comintzende s’alveschida ‘e su melcuris
andaian a si ponner sa chigina.
Una olta ch’intrein fen’a intro ‘e chegia,
ma s’agatteit babbai Biancu, su rettore,
chi intrende in gianna si peseit a boghes:
O peldèu – nachi – e ite cheret cul’sta zente,
culto’ bagasso’, culto’ peccadores !
A fora, a fora dae sa chegia mia !
o giamo sa giultiscia e bo si pigiat !"
Fatt’est chi si ch’andeni a sa chentina
a si ponner pari pari sa chigina.
Tando est chi a sa chentina si ch’andeni
e paris sa chigina si ponzeni.
Pianghende s’imbreaghera Peppispanu
gighiat ancora un orineri in manu,
pienadu a mele e a bicculos de catta.
Mintet sa manu tantu ‘e l’assazare,
pero su mele li pariat istranu.
Si girat a Masia impiberidu:
Domenicaccio, brutto traditore,
questo miele è salito, cos’hai fatto !?
Caro Giuseppe, amico mio sincero,
non ti arrabbiare, ci ho solo pisciato...
Pesein s’ultimu gridu: "Giolzi meu !"
Ma oramai no aian pius un’untza ‘e alenu.
E s’imbolein, comente fin e tottu,
in bestire nieddu
cuddas pumas de colvu
e sa cobelta etza ettada in coddu..